Ruottalaisesta lauluarkiivistä / Svenskt visarkiv

Tervetuloa Ruottin tutkimusarkiihviin kansanmusikille, lauluile, vanheemille popyläärimusikille, jassile ja kansaliselle tansile.

Mitäs Ruottalainen lauluarkiivi tekkee?

Lauluarkiivi kokoa sisäle, säilyttää, tutkii ja kertoo musikin ja tansin kulttuuriperinöstä Ruottissa. Met tehemä töitä aluheila kansanmusikki, laulut, vanheempi popyläärimusikki, jassi ja kansalinen tansi. Arkiivi oon auki kaikile jokka halvaavat ottaa ossaa kokoelmista.

Enämpi ko lauluja kokoelmissa

Sie löyät meilä muun muassa käsikirjotettuja laulukirjoja eri osista Ruottia, saanvuenvanhoita nauhotuksia saamelaisista joikkauksista, entisiä iskelmänuottia, orkinaalijärjestelyjä jassiorkesterille, filmattuja tansitokymentasuunia ja koko rejviarkiivin.

Kokoelmissa oon ääni- ja filminauhotuksia, nuottia, tekstiä, valokuvia, kirjoja, henkilö- ja organisasuuniarkiiviä ja suuri referensikirjasto.

Auki kaikile

Meän webbikatalookista sie saatat hakea ääninauhotuksista ja 100 000 lauluista ja kappalheista. Met tehemä jatkuvasti saataviksi meän kokoelmat tikitaalisti. Ota mielelhääns ekspetisuuni kansa yhtheyttä jos sulla oon kysymyksiä elikkä jos sie halvaat jatkaa hakemista kokoelmissa. Meän aine-ekspertit vastaavat kysymykshiin koko maan henkilöiltä ja institysuunilta. Sie saatat kansa käyä meilä paikan päälä Stokholmissa.

Tutkimus ja kokoaminen

Ruottin lauluarkiivi oon tehny tutkimusta 1951 alusta asti, useasti meän omat kokoelmat lähtökohtana. Met tehemä yhtheistyötä yniversiteetitten, korkeakouluitten ja muitten kulttuuri-institysuunitten kansa, niin Ruottissa ko kansanvälisesti.

Tutkimusta julkasthaan kirjamuotoina, levyinä, webbiesitelminä ja ylheisöesityksinnä. Lauluarkiivi antaa kansa ulos vuosittaisen tietheelisesti tarkistetun avisin Puls – musikki- ja tansietnolookinen avisi.

Ruottalainen lauluarkiivi oon osa Ruottin Statens musikverk / musikkilaitoksen virastosta.